תהילים יחד לזכות SHHayQCJEWIANuUeY

(א) לְדָוִד בְּשַׁנּוֹתוֹ אֶת־טַעְמוֹ לִפְנֵי אֲבִימֶלֶךְ וַיְגָרֲשֵׁהוּ וַיֵּלַךְ׃ (ב) אֲבָרֲכָה אֶת־אֲ־דֹנָי בְּכָל־עֵת תָּמִיד תְּהִלָּתוֹ בְּפִי׃ (ג) בַּיהוָה תִּתְהַלֵּל נַפְשִׁי יִשְׁמְעוּ עֲנָוִים וְיִשְׂמָחוּ׃ (ד) גַּדְּלוּ לַיהוָה אִתִּי וּנְרוֹמְמָה שְׁמוֹ יַחְדָּו׃ (ה) דָּרַשְׁתִּי אֶת־אֲ־דֹנָי וְעָנָנִי וּמִכָּל־מְגוּרוֹתַי הִצִּילָנִי׃ (ו) הִבִּיטוּ אֵלָיו וְנָהָרוּ וּפְנֵיהֶם אַל־יֶחְפָּרוּ׃ (ז) זֶה עָנִי קָרָא וַיהוָה שָׁמֵעַ וּמִכָּל־צָרוֹתָיו הוֹשִׁיעוֹ׃ (ח) חֹנֶה מַלְאַךְ־אֲ־דֹנָי סָבִיב לִירֵאָיו וַיְחַלְּצֵם׃ (ט) טַעֲמוּ וּרְאוּ כִּי־טוֹב אֲ־דֹנָי אַשְׁרֵי הַגֶּבֶר יֶחֱסֶה־בּוֹ׃ (י) יְראוּ אֶת־אֲ־דֹנָי קְדֹשָׁיו כִּי־אֵין מַחְסוֹר לִירֵאָיו׃ (יא) כְּפִירִים רָשׁוּ וְרָעֵבוּ וְדֹרְשֵׁי אֲ־דֹנָי לֹא־יַחְסְרוּ כָל־טוֹב׃ (יב) לְכוּ־בָנִים שִׁמְעוּ־לִי יִרְאַת אֲ־דֹנָי אֲלַמֶּדְכֶם׃ (יג) מִי־הָאִישׁ הֶחָפֵץ חַיִּים אֹהֵב יָמִים לִרְאוֹת טוֹב׃ (יד) נְצֹר לְשׁוֹנְךָ מֵרָע וּשְׂפָתֶיךָ מִדַּבֵּר מִרְמָה׃ (טו) סוּר מֵרָע וַעֲשֵׂה־טוֹב בַּקֵּשׁ שָׁלוֹם וְרָדְפֵהוּ׃ (טז) עֵינֵי אֲ־דֹנָי אֶל־צַדִּיקִים וְאָזְנָיו אֶל־שַׁוְעָתָם׃ (יז) פְּנֵי אֲ־דֹנָי בְּעֹשֵׂי רָע לְהַכְרִית מֵאֶרֶץ זִכְרָם׃ (יח) צָעֲקוּ וַיהוָה שָׁמֵעַ וּמִכָּל־צָרוֹתָם הִצִּילָם׃ (יט) קָרוֹב אֲ־דֹנָי לְנִשְׁבְּרֵי־לֵב וְאֶת־דַּכְּאֵי־רוּחַ יוֹשִׁיעַ׃ (כ) רַבּוֹת רָעוֹת צַדִּיק וּמִכֻּלָּם יַצִּילֶנּוּ אֲ־דֹנָי׃ (כא) שֹׁמֵר כָּל־עַצְמוֹתָיו אַחַת מֵהֵנָּה לֹא נִשְׁבָּרָה׃ (כב) תְּמוֹתֵת רָשָׁע רָעָה וְשֹׂנְאֵי צַדִּיק יֶאְשָׁמוּ׃ (כג) פּוֹדֶה אֲ־דֹנָי נֶפֶשׁ עֲבָדָיו וְלֹא יֶאְשְׁמוּ כָּל־הַחֹסִים בּוֹ׃