תהילים יחד לרפואת מאיר בן חנה

(א) אֵל־נְקָמוֹת אֲ־דֹנָי אֵל נְקָמוֹת הוֹפִיַע׃ (ב) הִנָּשֵׂא שֹׁפֵט הָאָרֶץ הָשֵׁב גְּמוּל עַל־גֵּאִים׃ (ג) עַד־מָתַי רְשָׁעִים אֲ־דֹנָי עַד־מָתַי רְשָׁעִים יַעֲלֹזוּ׃ (ד) יַבִּיעוּ יְדַבְּרוּ עָתָק יִתְאַמְּרוּ כָּל־פֹּעֲלֵי אָוֶן׃ (ה) עַמְּךָ אֲ־דֹנָי יְדַכְּאוּ וְנַחֲלָתְךָ יְעַנּוּ׃ (ו) אַלְמָנָה וְגֵר יַהֲרֹגוּ וִיתוֹמִים יְרַצֵּחוּ׃ (ז) וַיֹּאמְרוּ לֹא יִרְאֶה־יָּהּ וְלֹא־יָבִין אֱלֹהֵי יַעֲקֹב׃ (ח) בִּינוּ בֹּעֲרִים בָּעָם וּכְסִילִים מָתַי תַּשְׂכִּילוּ׃ (ט) הֲנֹטַע אֹזֶן הֲלֹא יִשְׁמָע אִם־יֹצֵר עַיִן הֲלֹא יַבִּיט׃ (י) הֲיֹסֵר גּוֹיִם הֲלֹא יוֹכִיחַ הַמְלַמֵּד אָדָם דָּעַת׃ (יא) אֲ־דֹנָי יֹדֵעַ מַחְשְׁבוֹת אָדָם כִּי־הֵמָּה הָבֶל׃ (יב) אַשְׁרֵי הַגֶּבֶר אֲשֶׁר־תְּיַסְּרֶנּוּ יָּהּ וּמִתּוֹרָתְךָ תְלַמְּדֶנּוּ׃ (יג) לְהַשְׁקִיט לוֹ מִימֵי רָע עַד יִכָּרֶה לָרָשָׁע שָׁחַת׃ (יד) כִּי לֹא־יִטֹּשׁ אֲ־דֹנָי עַמּוֹ וְנַחֲלָתוֹ לֹא יַעֲזֹב׃ (טו) כִּי־עַד־צֶדֶק יָשׁוּב מִשְׁפָּט וְאַחֲרָיו כָּל־יִשְׁרֵי־לֵב׃ (טז) מִי־יָקוּם לִי עִם־מְרֵעִים מִי־יִתְיַצֵּב לִי עִם־פֹּעֲלֵי אָוֶן׃ (יז) לוּלֵי אֲ־דֹנָי עֶזְרָתָה לִּי כִּמְעַט שָׁכְנָה דוּמָה נַפְשִׁי׃ (יח) אִם־אָמַרְתִּי מָטָה רַגְלִי חַסְדְּךָ אֲ־דֹנָי יִסְעָדֵנִי׃ (יט) בְּרֹב שַׂרְעַפַּי בְּקִרְבִּי תַּנְחוּמֶיךָ יְשַׁעַשְׁעוּ נַפְשִׁי׃ (כ) הַיְחָבְרְךָ כִּסֵּא הַוּוֹת יֹצֵר עָמָל עֲלֵי־חֹק׃ (כא) יָגוֹדּוּ עַל־נֶפֶשׁ צַדִּיק וְדָם נָקִי יַרְשִׁיעוּ׃ (כב) וַיְהִי אֲ־דֹנָי לִי לְמִשְׂגָּב וֵאלֹהַי לְצוּר מַחְסִי׃ (כג) וַיָּשֶׁב עֲלֵיהֶם אֶת־אוֹנָם וּבְרָעָתָם יַצְמִיתֵם יַצְמִיתֵם אֲ־דֹנָי אֱלֹהֵינוּ׃