תהילים יחד לרפואת הדסה שולמית בת חנה

(א) הוֹדוּ לַיהוָה כִּי־טוֹב כִּי לְעוֹלָם חַסְדּוֹ׃ (ב) יֹאמַר־נָא יִשְׂרָאֵל כִּי לְעוֹלָם חַסְדּוֹ׃ (ג) יֹאמְרוּ־נָא בֵית־אַהֲרֹן כִּי לְעוֹלָם חַסְדּוֹ׃ (ד) יֹאמְרוּ־נָא יִרְאֵי אֲ־דֹנָי כִּי לְעוֹלָם חַסְדּוֹ׃ (ה) מִן־הַמֵּצַר קָרָאתִי יָּהּ עָנָנִי בַמֶּרְחָב יָהּ׃ (ו) אֲ־דֹנָי לִי לֹא אִירָא מַה־יַּעֲשֶׂה לִי אָדָם׃ (ז) אֲ־דֹנָי לִי בְּעֹזְרָי וַאֲנִי אֶרְאֶה בְשֹׂנְאָי׃ (ח) טוֹב לַחֲסוֹת בַּיהוָה מִבְּטֹחַ בָּאָדָם׃ (ט) טוֹב לַחֲסוֹת בַּיהוָה מִבְּטֹחַ בִּנְדִיבִים׃ (י) כָּל־גּוֹיִם סְבָבוּנִי בְּשֵׁם אֲ־דֹנָי כִּי אֲמִילַם׃ (יא) סַבּוּנִי גַם־סְבָבוּנִי בְּשֵׁם אֲ־דֹנָי כִּי אֲמִילַם׃ (יב) סַבּוּנִי כִדְבוֹרִים דֹּעֲכוּ כְּאֵשׁ קוֹצִים בְּשֵׁם אֲ־דֹנָי כִּי אֲמִילַם׃ (יג) דַּחֹה דְחִיתַנִי לִנְפֹּל וַיהוָה עֲזָרָנִי׃ (יד) עָזִּי וְזִמְרָת יָהּ וַיְהִי־לִי לִישׁוּעָה׃ (טו) קוֹל רִנָּה וִישׁוּעָה בְּאָהֳלֵי צַדִּיקִים יְמִין אֲ־דֹנָי עֹשָׂה חָיִל׃ (טז) יְמִין אֲ־דֹנָי רוֹמֵמָה יְמִין אֲ־דֹנָי עֹשָׂה חָיִל׃ (יז) לֹא אָמוּת כִּי־אֶחְיֶה וַאֲסַפֵּר מַעֲשֵׂי יָהּ׃ (יח) יַסֹּר יִסְּרַנִּי יָּהּ וְלַמָּוֶת לֹא נְתָנָנִי׃ (יט) פִּתְחוּ־לִי שַׁעֲרֵי־צֶדֶק אָבֹא־בָם אוֹדֶה יָהּ׃ (כ) זֶה־הַשַּׁעַר לַיהוָה צַדִּיקִים יָבֹאוּ בוֹ׃ (כא) אוֹדְךָ כִּי עֲנִיתָנִי וַתְּהִי־לִי לִישׁוּעָה׃ (כב) אֶבֶן מָאֲסוּ הַבּוֹנִים הָיְתָה לְרֹאשׁ פִּנָּה׃ (כג) מֵאֵת אֲ־דֹנָי הָיְתָה זֹּאת הִיא נִפְלָאת בְּעֵינֵינוּ׃ (כד) זֶה־הַיּוֹם עָשָׂה אֲ־דֹנָי נָגִילָה וְנִשְׂמְחָה בוֹ׃ (כה) אָנָּא אֲ־דֹנָי הוֹשִׁיעָה נָּא אָנָּא אֲ־דֹנָי הַצְלִיחָה נָּא׃ (כו) בָּרוּךְ הַבָּא בְּשֵׁם אֲ־דֹנָי בֵּרַכְנוּכֶם מִבֵּית אֲ־דֹנָי׃ (כז) אֵל אֲ־דֹנָי וַיָּאֶר לָנוּ אִסְרוּ־חַג בַּעֲבֹתִים עַד־קַרְנוֹת הַמִּזְבֵּחַ׃ (כח) אֵלִי אַתָּה וְאוֹדֶךָּ אֱלֹהַי אֲרוֹמְמֶךָּ׃ (כט) הוֹדוּ לַיהוָה כִּי־טוֹב כִּי לְעוֹלָם חַסְדּוֹ׃